Православный календарь на 05-09-2023

Успения Пресвятой Богородицы

Тропарь, глас 1

В рождестве́ де́вство сохрани́ла еси́,/ во успе́нии ми́ра не оста́вила еси́, Богоро́дице,/ преста́вилася еси́ к животу́,/ Ма́ти су́щи Живота́,// и моли́твами Твои́ми избавля́еши от сме́рти ду́ши на́ша.

Кондак, глас 2

В моли́твах Неусыпа́ющую Богоро́дицу/ и в предста́тельствах непрело́жное упова́ние/ гроб и умерщвле́ние не удержа́ста:/ я́коже бо Живота́ Ма́терь/ к животу́ преста́ви// во утро́бу Всели́выйся присноде́вственную.

Величание

Велича́ем Тя,/ Пренепоро́чная/ Ма́ти Христа́ Бо́га на́шего,/ и всесла́вное сла́вим// успе́ние Твое́.

Мученика Луппа

Тропарь, глас 4

Му́ченик Твой, Го́споди, Лу́ппе,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.

Кондак, глас 2

Звезда́ све́тлая яви́лся еси́/ непреле́стная ми́рови,/ Со́лнца Христа́ возвеща́ющи,/ заря́ми твои́ми, страстоте́рпче Лу́ппе,/ и пре́лесть погаси́л еси́ всю,/ нам же пода́еши свет, моля́ся непреста́нно о всех нас.

Величание

Велича́ем тя,/ страстоте́рпче святы́й Лу́ппе,/ и чтим честна́я страда́ния твоя́,/ я́же за Христа́/ претерпе́л еси́.

Священномученика Иринея, епископа Лионского

Тропарь, глас 1

Брег морски́й Аси́и Ма́лыя/ рождество́м и ю́ностию твои́ми хва́лится,/ сла́вне священному́чениче Ирине́е,/ и град Лио́нский/ си́льным огражде́нный предста́тельством твои́м,/ велича́ет милосе́рдаго Бо́га на́шего./ Га́ия лику́ет/ о муче́нии твое́м за Христа́,/ вся же Це́рковь Правосла́вная/ непреста́но ра́дуется,/ чистото́ю уче́ния утвержде́нная,/ его́же пропове́дал еси́,/ ми́ром Христо́вым духо́вныя бу́ри уста́вив,// я́же обыдо́ша ду́ши на́ша.

Кондак, глас 6

В Ду́се и и́стине/ Тро́ицу Святу́ю почита́я,/ о пресла́вне священному́чениче Ирине́е,/ словеса́ апо́стольская во уме́ держа́,/ созида́ющею ду́ши любо́вию/ су́етнаго ра́зума кича́щаго/ отврати́лся еси́,/ и пусты́м и лжи испо́лненным/ ерети́ческим измышле́нием противуста́,/ та́ко и о́вцы ста́да Христо́ва/ скве́рнаго неду́га ерети́ческаго/ удержа́ и сохрани́./ Се́го ра́ди, Триеди́наго Бо́га хва́ляще/ пе́сньми тя прославля́ем// я́ко блаже́ннаго миротво́рца.

Величание

Велича́ем тя,/ священному́чениче Иринее,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Священномученика Иоанна Восторгова

Тропарь, глас 5

Любо́вию к Бо́гу распаля́емь,/ жи́знь свою́ му́ченически за Христа́ и бли́жних положи́л еси́,/ сего́ ра́ди вене́ц пра́вды от Него́ прия́л еси́./ Моли́ Всеблага́го Бо́га, священному́чениче Иоа́нне, Це́рковь Святу́ю сохрани́ти в ми́ре// и спасти́ души́ на́ша.

Кондак, глас 4

Во святи́телех благоче́стно пожи́в и муче́ния путь проше́д, и́дольския угаси́л еси́ же́ртвы, и побо́рник быв твое́му ста́ду, богом́удре. Те́мже тя почита́юще, та́йно вопие́м ти: от бед изба́ви ны при́сно твои́ми мольба́ми, о́тче наш Иоа́нне.

Величание

Велича́ем тя,/ священному́чениче Иоа́нне,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.