Православный календарь на 11-04-2023

Великий Вторник

Тропарь, глас 8

Се, Жени́х гряде́т в полу́нощи,/ и блаже́н раб, его́же обря́щет бдя́ща,/ недосто́ин же па́ки, его́же обря́щет уныва́юща./ Блюди́ у́бо, душе́ моя́,/ не сном отяготи́ся,/ да не сме́рти предана́ бу́деши,/ и Ца́рствия вне затвори́шися,/ но воспряни́ зову́щи:// Свят, Свят, Свят еси́, Бо́же, Богоро́дицею поми́луй нас.

 Кондак, глас 2

Час, душе́, конца́ помы́сливши,/ и посече́ния смоко́вницы убоя́вшися,/ да́нный тебе́ тала́нт трудолю́бно де́лай, окая́нная,/ бо́дрствующи и зову́щи:// да не пребу́дем вне черто́га Христо́ва.

 Ексапостиларий

Черто́г Тво́й ви́жду, Спа́се мой, украше́нный, и оде́жды не и́мам, да вни́ду вонь: просвети́ одея́ние души́ моея́, Светода́вче, и спаси́ мя.

Священномученика Марка, епископа Арефусийского

Тропарь, глас 4

И нра́вом прича́стник,/ и престо́лом наме́стник апо́столом быв,/ дея́ние обре́л еси́, богодухнове́нне,/ в виде́ния восхо́д:/ сего́ ра́ди сло́во и́стины исправля́я,/ и ве́ры ра́ди пострада́л еси́ да́же до кро́ве,/ священному́чениче Ма́рко,/ моли́ Христа́ Бо́га// спасти́ся душа́м на́шим.

Кондак, глас 4

Во святи́телех благоче́стно пожи́в/ и муче́ния путь проше́д,/ и́дольския угаси́л еси́ же́ртвы,/ и побо́рник быв твоему́ ста́ду, богому́дре./ Те́мже тя почита́юще, та́йно вопие́м ти:/ от бед изба́ви ны при́сно твои́ми мольба́ми,// о́тче наш Ма́рко.

Величание

Велича́ем тя,/ священному́чениче Ма́рко,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Преподобных Марка, Ионы и Корнилия Псково-Печерских

Тропарь, глас 8

Яко свети́льницы, яви́стеся всесве́тлии/ в верте́пе Цари́цы Богома́тери,/ преподо́бнии отцы́ на́ши Ма́рко, Ио́но и Корни́лие,/ вы бо, крест Христо́в на ра́мо взе́мше,/ усе́рдно Тому́ после́довасте/ и, чистото́ю Бо́гови приближи́вшеся,/ отону́дуже си́лами чуде́с обога́тистеся./ Тем и мы любе́зно прибега́ем к вам и уми́льно глаго́лем:/ о преподо́бнии, моли́те Христа́ Бо́га/ спасти́ся душа́м на́шим.

Ин тропарь, глас 4

Пусты́нническаго жития́ нача́льницы,/ оби́тели Богома́терния устрои́телие,/ преподо́бнии отцы́ Ма́рко, Ио́но и Корни́лие,/ и сподви́жница сла́вная Ва́ссо,/ во святе́й горе́ у пото́ка Каменца подвиза́вшиеся,/ и та́мо во глуби́нах недр земли́ храм ископа́вшии;/ последи́же и́ноки ту собра́вшеся,/ доброде́тельми сия́юще, оби́тель украша́ху./ Ны́не же в Небе́снех Черто́зех лику́ете,/ моля́щеся ко Го́споду приле́жно,/ во е́же спасти́ся нам.

Кондак, глас 2

Христо́вою любо́вию уязви́вшеся,/ преподо́бнии, и Того́ крест на ра́мо взе́мше,/ понесли́ есте́ Боже́ственне, вооружи́вшеся на неви́димыя враги́/ и непреста́нныя моли́твы, я́ко копие́, в рука́х иму́ще кре́пко,/ победи́ли есте́ бесо́вская ополче́ния,/ тем зове́м вам:/ ра́дуйтеся, преподо́бнии отцы́ на́ши Ма́рко, Ио́но и Корни́лие,/ ве́рных удобре́ние.

Ин кондак, глас 8

Днесь ве́рнии лико́вствуют,/ па́мять преподо́бных Пско́во-Пече́рских соверша́юще./ Днесь бо в черто́зех Царя́ сла́вы мо́лятся,/ помина́юще на́ши не́мощи и печа́ли,/ непреста́нно про́сят дарова́ть нам мир/ и ве́лию ми́лость.

Величание

Ублажа́ем вас,/ преподо́бнии отцы́ Ма́рко, Ио́но и Корни́лие, со Ва́ссою сла́вною,/ и чтим святу́ю па́мять ва́шу,/ наста́вницы мона́хов/ и собесе́дницы а́нгелов.