Православный календарь на 04-03-2023

Великомученика Феодора Тирона

Тропарь, глас 2

Ве́лия ве́ры исправле́ния,/ во исто́чнице пла́мене, я́ко на воде́ упокое́ния,/ святы́й му́ченик Фео́дор ра́довашеся,/ огне́м бо всесожже́гся,/ я́ко хлеб сла́дкий Тро́ице принесе́ся./ Того́ моли́твами, Христе́ Бо́же, спаси́ ду́ши на́ша.

Кондак, глас 8

Ве́ру Христо́ву, я́ко щит, внутрь прии́мь в се́рдце твое́м,/ проти́вныя си́лы попра́л еси́, многострада́льче,/ и венце́м Небе́сным венча́лся еси́ ве́чно, Фео́доре,// я́ко непобеди́мый.

Величание

Велича́ем тя,/ страстоте́рпче святы́й Фео́доре,/ и чтим честна́я страда́ния твоя́,/ я́же за Христа́/ претерпе́л еси́.

Апостола от 70-ти Архиппа Колосского

Тропарь, глас 3

Учени́че Па́влов и апо́столе Христо́в, Архи́ппе,/ Ева́нгелия провозве́стниче и Колосса́ев учи́телю,/ ка́менное побие́ние прие́мый,/ а́ки драгоце́нное украше́ние,/ и́мже вене́ц муче́ния украси́в, вшел еси́ на весе́лие Ца́рствия,/ иде́же помяни́ нас пою́щих твою́ па́мять,// апо́столов сопресто́льниче.

Ин тропарь, глас 3

Апо́столе святы́й Архи́ппе,/ моли́ Ми́лостиваго Бо́га,/ да прегреше́ний оставле́ние// пода́ст душа́м на́шим.

Кондак, глас 4

Я́ко звезду́ вели́кую, тя Це́рковь иму́щи, Архи́ппе,/ чуде́с твои́х луча́ми просвеща́ема, зове́т тебе́:// спаси́ ве́рою почита́ющия па́мять твою́.

Величание

Велича́ем тя,/ апо́столе Христо́в Архи́ппе,/ и чтим боле́зни и труды́ твоя́, и́миже труди́лся еси́// во благове́сти Христо́ве.

Апостолов Архиппа и Филимона

Тропарь, глас 3

Апо́столи святи́и,/ моли́те ми́лостиваго Бо́га,/ да прегреше́ний оставле́ние/ пода́ст душа́м на́шим.

Кондак, глас 2

Я́ко зве́зды всесве́тлыя, просвеща́ющия концы́,/ апо́столы Христо́вы восхва́лим, Филимо́на сла́вного, и Архи́ппа свяще́ннаго,/ и Они́сима, и Ма́рка, и Аполло́са, с ни́миже и Апфи́ю всему́друю, вопию́ще:// моли́те непреста́нно о всех нас.

Величание

Велича́ем вас,/ святи́и апо́столи Филимо́не и Архи́ппе,/ со равноапо́стольной Апфи́ей,/ весь мир уче́ньми свои́ми просвети́вшия/ и вся концы́ ко Христу́ приво́дшия.

Преподобного Феодора Санаксарского

Тропарь, глас 4

От ю́ности твоея́ сы́нове Христа́ возлюби́л еси́, и то́кмо Го́сподеви служи́ти восхоте́в, благу́ю ча́сть избра́л еси́, я́же не исхища́ется сме́ртию. Еди́ному на потре́бу себе́ преда́в и Жи́зни Пода́телю, от Него́ же сподо́бился еси́ даро́в боже́ственнаго учи́тельства и духо́внаго разсужде́ния, окормля́я все́х прибега́ющих к тебе́ и и́щущих души́ спасе́ние, богому́дре ста́рче Санакса́рский Фео́доре.

Кондак, глас 2

Мира суету и вся яже в нем тленная оставив, преподобне, в Санаксарскую обитель вселился еси, идеже ангельски пожив, многим путь был еси ко спасению, сего ради и Христос тебе даром разсуждения и учительства обогати, темже и мы вопием ти: спасай ны, Феодоре, святыми твоими молитвами!

Величание

Ублажа́ем тя,/ преподо́бне о́тче Феодоре,/ и чтим святу́ю па́мять твою́,/ наста́вниче мона́хов// и собесе́дниче А́нгелов.