Календарь за 16 мая 2026

Воскресный

Тропарь, глас 4

Све́тлую воскресе́ния про́поведь/ от А́нгела уве́деша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся сме́рть,/ воскре́се Христо́с Бо́г,// да́руяй ми́рови ве́лию ми́лость.

Недели о самаряныне

Кондак, глас 8

Ве́рою прише́дшая на кла́дязь самаряны́ня,/ ви́дя Тя прему́дрости во́ду,/ е́юже напои́шася оби́льно,// Ца́рствие вы́шнее насле́дова ве́чно, я́ко присносла́вная.

Мученика Тимофея, чтеца, и мученицы Мавры

Тропарь, глас 4

Мученицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.

Кондак, глас 4

Многообра́зныя я́звы претерпе́вше/ и венцы́ от Бо́га прие́мше,/ о нас моли́теся ко Го́споду,/ па́мять всесвяще́нную ва́шу соверша́ющих,/ превели́кий Тимофе́е и пресла́вная Ма́вро,/ е́же умири́ти град и лю́ди,/ Той бо есть ве́рных утвержде́ние.

Величание

Велича́ем вас,/ страстоте́рпцы святи́и Тимофе́е и Ма́вро,/ и чтим честна́я страда́ния ва́ша,/ я́же за Христа́/ претерпе́ли есте́.

Преподобного Феодосия, игумена Киево-Печерского

Тропарь, глас 8

Возвы́сився на доброде́тель, измла́да возлюби́в мона́шеское житие́,/ к жела́нию до́блественне дости́г, всели́лся еси́ в пеще́ру/ и, украси́в житие́ твое́ поще́нием и све́тлостию,/ в моли́твах, я́ко безпло́тен, пребыва́л еси́,/ в Росси́йстей земли́, я́ко све́тлое свети́ло, просия́в, о́тче Феодо́сие,// моли́ Христа́ Бо́га спасти́ся душа́м на́шим.

Кондак, глас 3

Звезду́ Росси́йскую днесь почти́м,/ от восто́ка возсия́вшую и на за́пад прише́дшую,/ всю бо страну́ сию́ чудесы́ и добро́тою обогати́вшу и вся ны/ соде́янием и благода́тию мона́шескаго уста́ва,// блаже́ннаго Феодо́сия. 

Величание

Ублажа́ем тя,/ преподо́бне о́тче Феодо́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобных Иулиании и Евпраксии Московских

Тропарь, глас 1

Христу́ Жениху́ уневе́ститися возжела́вшия/ и по́двиги и́ноческия Того́ ра́ди поне́сшия,/ доброде́тельным житие́м и любо́вию ко всем/ себе́ украси́вшия, преподо́бныя Иулиани́е и Евпракси́е,/ во гра́де Москве́ пе́рвыя оби́тели деви́ческия/ устрои́тельницы яви́стеся/ и трудо́в и по́двигов бра́та ва́шего святи́теля Алекси́я/ ревни́тельницы показа́стеся./ Сего́ ра́ди, ны́не на Небесе́х вку́пе с ним торжеству́юще,/ моли́те гра́ду Москве́ в Правосла́вии утверди́тися,/ оби́тели ва́шей сохрани́тися// и спасти́ся душа́м на́шим.

Ин тропарь, глас 1

Христу́ Жениху́ уневе́ститися возжела́вшия,/ преподо́бныя Иулиани́е и Евпракси́е,/ во гра́де Москве́ оби́тели деви́ческия устрои́тельницы яви́стеся/ и бра́ту ва́шему, святи́телю Алекси́ю, в по́двизех подража́сте./ Сего́ ра́ди, ны́не на Небесе́х вку́пе с ним торжеству́юще,/ моли́те оби́тели ва́шей сохрани́тися,/ гра́ду Москве́ в Правосла́вии утверди́тися // и спасти́ся душа́м на́шим.

Кондак, глас 2

Что вас нарече́м, богому́дрыя Иулиани́е и Евпракси́е?/ Немощны́й сосу́д естество́м,/ но по́двиги и труды́ му́жески понесо́сте;/ смире́нныя жены́,/ но сла́вы отце́в вои́стину сподо́бистеся;/ ро́да честна́го от земны́х,/ но умале́нием себе́ Небе́снаго оте́чества достиго́сте.// Моли́те усе́рдно Влады́ку Христа́ спасти́ся душа́м на́шим.

Величание

Ублажа́ем вас,/ преподо́бныя Иулиани́е и Евпракси́е, и чтим святу́ю па́мять ва́шу, вы бо мо́лите за нас// Христа́ Бо́га на́шего.

Cвященномученика Николая Беневоленского

Тропарь, глас 2

Благода́тию свяще́нства украси́вся,/ до́брый па́стырь ве́рным лю́дем яви́лся еси́,/ и Христу́ да́же до сме́рти после́довав,/ вене́ц жи́зни от Него́ прия́л еси́./ Те́мже ны́не помина́й нас, священному́чениче Нико́лае,// и моли́ся о спасе́нии душ на́ших.

Ин тропарь, глас 4

Я́ко чадолюби́вый оте́ц и учи́тель благоче́стия,/ па́ству твою́ до́бре упа́сл еси́,/ милосе́рдием же и кро́тостию нра́ва украше́н,/ о́браз ве́ры во страда́ниих за Христа́ показа́л еси́./ Те́мже ны́не в Небе́сных черто́зех пребыва́я,/ помина́й нас, чту́щих святу́ю па́мять твою́,// священному́чениче Нико́лае досточу́дне.

Кондак, глас 6

Сро́дник и учени́к преподо́бнаго Алекси́я яви́лся еси́,/ священному́чениче Нико́лае всехва́льне,/ и я́ко до́блий во́ин Христо́в,/ ку́плю жите́йскую отри́нув,/ всего́ себе́ служе́нию Це́ркви Бо́жией посвяти́л еси́/ и в черто́г Небе́сный вше́л еси́, глаго́ля:/ под кро́вом Го́спода моего́// обря́щу поко́й и заступле́ние.

Величание

Велича́ем тя,/ священному́чениче Нико́лае,/ и чтим честна́я страда́ния твоя́,/ я́же за Христа́/ во утвержде́ние на Руси́ Правосла́вия/ претерпе́л еси́.

Божией Матери пред иконой Ее «Успение» Киево-Печерской

Тропарь, глас 4

Днесь све́тло торжеству́ет Пече́рская оби́тель,/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:// ра́дуйся, Благода́тная, Пече́рская похвало́.

Кондак, глас 3

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,// оби́тель Пече́рскую украша́ющем.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.

Божией Матери пред иконой Ее Печерской

Тропарь, глас 4

Днесь све́тло торжеству́ет Пече́рская оби́тель,/ и ра́дуется явле́нием о́браза Богома́тере/ безме́рный лик Пече́рских отце́в,/ с ни́миже и мы непреста́нно вопие́м:// ра́дуйся, Благода́тная, Пече́рская похвало́.

Кондак, глас 3

Де́ва днесь неви́димо предстои́т в це́ркви/ и с ли́ки Пече́рских отце́в мо́лится о нас,/ благогове́йно велича́ющих Ея́ безме́рную ми́лость к ро́ду на́шему,/ я́вльшуюся в чу́дном о́бразе Ея́,// оби́тель Пече́рскую украша́ющем.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния // всем с ве́рою притека́ющим.

Божией Матери пред иконой Ее Свенской (Печерской)

Тропарь, глас 4

Днесь све́тло торжеству́ет Све́нская оби́тель;/ и ра́дуется явле́нием о́браза Богома́тери;/ Безме́рный лик Пече́рских отце́в/ с ни́ми же и мы непреста́нно вопие́м:// ра́дуйся Благода́тная Све́нская Похвало́.

Ин тропарь, глас 5

Пресвята́я Де́во Богоро́дице, / земли́ Бря́нстей благослове́ние и покро́в / Све́нский—Пече́рский о́браз Твой дарова́ла еси́, / и́мже Правосла́вие утвержда́еши, / е́реси и раско́лы побежда́еши, / исцеле́ния источа́еши, / наше́ствия иноплеме́нных отража́еши / и междоусо́бныя бра́ни умиря́еши, / те́мже благода́рно воспева́ем Тя, // Оте́чества на́шего похвалу́ и заступле́ние.

Величание

Досто́йно есть / велича́ти Тя, / Богоро́дице, / земли́ Ру́сския Цари́цу Небе́сную, / Све́нский о́браз Твой в ней просла́вльшую.