Православный календарь на 23-09-2025

Рождества Пресвятой Богородицы

Тропарь, глас 4

Рождество́ Твое́, Богоро́дице Де́во,/ ра́дость возвести́ всей вселе́нней:/ из Тебе́ бо возсия́ Со́лнце Пра́вды, Христо́с Бог наш,/ и, разруши́в кля́тву, даде́ благослове́ние,// и, упраздни́в смерть, дарова́ нам живо́т ве́чный.

Кондак, глас 4

Иоаки́м и А́нна поноше́ния безча́дства/ и Ада́м и Е́ва от тли сме́ртныя свободи́стася, Пречи́стая,/ во святе́м рождестве́ Твое́м./ То пра́зднуют и лю́дие Твои́,/ вины́ прегреше́ний изба́вльшеся,/ внегда́ зва́ти Ти:// непло́ды ражда́ет Богоро́дицу и Пита́тельницу Жи́зни на́шея.

Мучениц Минодоры, Митродоры и Нимфодоры

Тропарь, глас 1

Агницы слове́сныя Агнцу и Па́стырю приведо́стеся муче́нием ко Христу́,/ тече́ние сконча́вше, и ве́ру соблю́дше./ Те́мже днесь ра́достною душе́ю соверша́ем, досточу́днии, святу́ю ва́шу па́мять,/ Христа́ велича́юще.

Кондак, глас 4

За Тро́ицу терпели́вно страда́льчествовавшия,/ многоко́зненнаго врага́ победи́сте,/ бра́тски обле́кшеся Ду́хом,/ те́мже водвори́стеся с пятьми́ де́вами/ в Hебе́сном, страстоте́рпицы, черто́зе,/ и со А́нгелы Всецарю́// в весе́лии непреста́нно предстоите́.

Величание

Велича́ем вас,/ страстоте́рпицы святы́я Минодо́ро, Митродо́ро и Нимфодо́ро,/ и чтим честна́я страда́ния ва́ша,/ я́же за Христа́/ претерпе́ли есте́.

Преподобного Павла Послушливого, Печерского, в Дальних пещерах

Тропарь, глас 3

Послуша́нию Христо́ву подража́вый,/ и и́мени Его́ ра́ди во вся́ком послуша́нии,/ терпели́вне, да́же до сме́рти, Па́вле всече́стне, потруди́выйся,/ мзду же ны́не послуша́ния своего́ трудолю́бно от Го́спода прие́м,// к Нему́ всегда́ моли́ся о нас, пою́щих тя.

Кондак, глас 1

Послу́шника и́стинна и преподо́бным равноче́стна,/ всеблаже́ннаго отца́ на́шего Па́вла,/ прииди́те, люби́мицы, усе́рдне ублажи́м,// я́ко моля́щася непреста́нно о всех нас.

Величание

Ублажа́ем тя,/ преподо́бне о́тче Па́вле,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобного Иоасафа Спасокубенского

Тропарь, глас 2

Насажде́нный при вода́х воздержа́ния,/ струя́ми слез твои́х напая́ем,/ я́ко ле́торасль живоно́сная в вертогра́де Це́ркве Бо́жия процве́л еси́, блаже́нне Иоаса́фе,/ плоды́ доброде́телей возраща́я и ду́ши ве́рующих пита́я./ Те́мже и Христо́с в Небе́сныя страны́ тя пресели́./ Но помина́й нас, любо́вию святу́ю па́мять твою́ чту́щих, благове́рне кня́же,/ и моли́ Пресвяту́ю Тро́ицу, во е́же спасти́ся душа́м на́шим.

Ин тропарь, глас 2

Я́ко дре́во насажде́нно при вода́х воздержа́ния,/ струя́ми слез твои́х напая́ем, преподо́бне о́тче Иоаса́фе,/ се́яв бо слеза́ми, в ра́дости жне́ши доброде́тельныя рукоя́ти./ Тем Вели́кий Мздовоздая́тель в жи́тницах Небе́сных тя сокро́вище положи́,/ но помина́й чту́щих любо́вию пресве́тлую па́мять твою́,/ моли́ Святу́ю Тро́ицу, преподо́бне Иоаса́фе,/ спасти́ся душа́м на́шим.

Кондак, глас 4

Яви́ся ве́лие со́лнце Христо́ве Це́ркви,/ просвеща́я тех житие́м свои́м, всече́стне,/ я́ко черпа́лом златы́м от кла́дезя неиско́паннаго,/ чудеса́ поче́рпл еси́ от Исто́чника неистощи́маго,/ на успе́ние свое́ прише́л еси́, всеблаже́нне Иоаса́фе,/ ныне́ всем дае́ши грехо́м проще́ние.

Величание

Ублажа́ем тя,/ преподо́бне о́тче Иоаса́фе,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Собора Липецких святых

Тропарь, глас 4

Дне́сь ра́дуется све́тло Липецкая земля́, прославля́юще святы́я своя́, ве́рно Го́сподеви послужи́вшия и Це́рковь Ру́сскую украсившия: О, преди́внии сро́дницы на́ши, святи́телие, преподо́бнии, новому́ченицы и испове́дницы, в по́двизех и страда́ниих Бо́гу угоди́вшии, и о́браз благоче́стия в житии́ на́м показа́вшии, Оте́чество на́ше соблюди́те в ми́ре и благоде́нствии, и на пути́ земна́го стра́нствия на́шего те́плии засту́пницы и споспе́шницы бу́дите, посреди́ искуше́ний же и бе́д к ве́чному Оте́честву на́с приводя́щии.

Кондак, глас 3

Ны́не явля́ет Це́рковь Ру́сская Собо́р святы́х земли́ Липецкия, престо́лу Пресвяты́я Тро́ицы предстоя́щих, и о спасе́нии на́шем при́сно ходатайствующих, и́мже и мы́ благода́рственная пе́ния прино́сим и согла́сно вопие́м: ра́дуйтеся, преди́внии чудотво́рцы, и те́плии о на́с пред Бо́гом моли́твенницы.

Величание

Велича́ем вас,/ святи́и в земли́ Ли́пецтей и Еле́цтей просиявшии,/ и чтим святу́ю па́мять ва́шу,/ вы бо мо́лите за нас// Христа́ Бо́га на́шего.

Священномученика Василия Максимова

Тропарь, глас 4

Па́стырю до́брый и кро́ткий,/ Це́ркве Христо́вы ве́рный служи́телю,/ па́ству твою́ Сло́вом Жи́зни пита́я,/ лю́тых муче́ний не убоя́лся еси́,/ смерть за Христа́ претерпе́вый,/ венца́ нетле́ннаго сподо́бился еси́,/ священному́чениче Васи́лие,/ моли́ Христа́ Бо́га// спасти́ся душа́м на́шим.

Ин тропарь, глас 3

Це́ркве Ру́сския сто́лпе непоколеби́мый,/ благоче́стия пра́вило,/ жития́ ева́нгельскаго о́бразе,/ священному́чениче Васи́лие,/ Христа́ ра́ди пострада́вый да́же до кро́ве,/ Его́же моли́ усе́рдно,/ я́ко Нача́льника и Соверши́теля спасе́ния,/ Русь Святу́ю утверди́ти в Правосла́вии // до сконча́ния ве́ка.

Кондак, глас 3

Ре́вность о Бо́зе стяжа́в измла́да,/ па́стырства крест восприя́л еси́,/ мно́гия ско́рби и боле́зни в житии́ твое́м претерпе́л еси́,/ утеше́ние в моли́тве обрета́я./ Лю́ди твоя́ в сму́тную годи́ну до́бре упа́сл еси́,/ сло́во и́стины усе́рдно возвеща́я./ Сего́ ра́ди от безбо́жных му́чителей лю́те гони́мый,/ сме́рти вре́менныя не устраши́лся еси́./ Священному́чениче Васи́лие,/ дерзнове́ние к Бо́гу име́я,// моли́ спасти́ся душа́м на́шим.

Ин кондак, глас 2

Восхва́лим, ве́рнии,/ изря́днаго в свяще́нницех и сла́внаго в му́ченицех Васи́лия,/ Правосла́вия побо́рника и благоче́стия ревни́теля,/ земли́ Ру́сския кра́сное прозябе́ние,/ и́же страда́нием Небесе́ дости́же/ и та́мо те́пле мо́лит Христа́ Бо́га // спасти́ся душа́м на́шим.

Величание

Велича́ем тя,/ священному́чениче Васи́лие,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.

Мученицы Татианы Гримблит

Тропарь, глас 3

Мироно́сицам жена́м в доброде́телех подража́ющи,/ в темни́цах и у́зах су́щим усе́рдно послужи́ла еси́/ и, о́браз ева́нгельскаго милосе́рдия на́м показа́вши,/ за Христа́ му́ченическую сме́рть прия́ла еси́,/ Татиа́но пресла́вная./ Ны́не, престо́лу Бо́жию предстоя́щи,// моли́ спасти́ся душа́м на́шим.

Кондак, глас 2

Сло́во Бо́жие се́рдцем твои́м восприе́мши,/ ми́ру распя́лася еси́,/ свята́я му́ченице Татиа́но,/ и, в служе́нии стра́ждущим Бо́гу угоди́вши,/ пло́д доброде́телей оби́лен пожа́ла еси́./ Сего́ ра́ди бу́ди на́м хода́таица/ и умоли́ Созда́теля все́х,/ безпло́дие серде́ц на́ших исцели́ти,/ да принесе́м Ему́ плоды́ покая́ния,// любо́вь, милосе́рдие и смире́ние.

Величание

Велича́ем тя,/ свята́я му́ченице Татиа́но,/ и чтим честна́я страда́ния твоя́,/ я́же за Христа́/ претерпе́ла еси́.

Священномученика Уаpа, епископа Липецкого

Тропарь, глас 4

Правосла́вныя ве́ры ревни́телю, раско́лов искорени́телю и безбо́жия обличи́телю. Моли́твою и трудо́м Творцу́ твоему́ да́же до кро́ве послужи́л еси́, пе́рвый святи́телю Ли́пецкий Уа́ре. О на́с Христа́ Бо́га моли́.

Ин тропарь, глас 4

Иже во святы́х му́ченик Твои́х,/ служи́тель Алтаря́ Госпо́дня ве́рный,/ да́же до крови́ за Христа́ подвиза́лся еси́,/ моли́твенниче наш усе́рдный./ Сего́ ра́ди Престо́лу Царя́ Сла́вы предстои́ши,/ но и нас не забыва́й, творя́щих па́мять твою́,// священному́чениче Уа́ре.

Кондак, глас 3

Пастыренача́льнику Христу́ подража́я, за вруче́нное ти́ ста́до ду́шу твою́ положи́л еси́ Уа́ре, архипа́стырю и му́чениче, моли́твами твои́ми па́ству твою́ соблюди́ невреди́му от все́х наве́т вра́жиих, да зове́м ти́: Ра́дуйся священному́чениче Уа́ре, архипа́стырю на́ш пречу́дный и покрови́телю кра́я Ли́пецкаго.

Величание

Велича́ем тя,/ священному́чениче Уа́ре,/ и чтим святу́ю па́мять твою́,/ ты бо мо́лиши о нас // Христа́ Бо́га на́шего.

Ино величание

Велича́ем тя,/ священному́чениче Уа́ре,/ и чтим честна́я страда́ния твоя́,/ я́же за Христа́ во утвержде́ние на Руси́ Правосла́вия // претерпе́л еси́.