Православный календарь на 18-09-2024

Пророка Захарии и праведной Елисаветы

Тропарь, глас 2

Пра́ведных Твои́х, Заха́рии и Елисаве́ты, Го́споди, па́мять пра́зднующе, / те́ми мо́лим Тя:/ спаси́ ду́ши на́ша.

Тропарь пророка Захарии, глас 4

Свяще́нства оде́ждею обложе́н, прему́дре,/ по зако́ну Бо́жию всесожже́ния прия́тна священноле́пно приноси́л еси́, Заха́рие,/ и был еси́ свети́льник и зри́тель та́йных,/ зна́мения в тебе́ благода́ти нося́ я́вственно, всему́дре,/ и, мече́м убие́н быв в хра́ме Бо́жии,/ Христо́в проро́че, с Предте́чею моли́// спасти́ся душа́м на́шим.

Кондак пророка Захарии, глас 3

Проро́к днесь и свяще́нник Вы́шняго,/ Заха́рия предложи́, Предте́чев роди́тель,/ трапе́зу своея́ па́мяти,/ ве́рныя пита́я, питие́ бо пра́вды всем раствори́в,/ сего́ ра́ди скончава́ется,// я́ко боже́ственный таи́нник Бо́жия благода́ти.

Кондак праведной Елисаветы, глас 4

Я́ко луна́ полна́,/ Свет Пра́вды от Мы́сленнаго Со́лнца Месси́и прия́ла еси́,/ и во всех за́поведех Госпо́дних с Заха́рием ходи́ла еси́, Боговозлю́бленная Елисаве́то./ Досто́йными у́бо тя пе́сньми ублажа́юще,/ Всеще́драго Све́та, просвеща́ющаго всех, // Господа велича́ем.

Величание

Величаем вас,/ святи́и пра́веднии Заха́рие и Елисаве́то,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Преподобномученика Афанасия, игумена Брестского

Тропарь, глас 2

Блаже́н еси́, о́тче наш Афана́сие,/ я́ко ве́рно пожи́л еси́, стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же чту́ще святы́ню твою́,/ со дерзнове́нием взыва́ем ти:/ о́тче наш, преподобному́чениче Афана́сие,// похвало́ и украше́ние на́ше.

Кондак, глас 4

Мона́шеского жития́ украше́ние и му́чеников красоту́/ яви́л себе́ житие́м твои́м, Афана́сие,/ и я́ко со́лнце пресве́тлое,/ лю́дям правосла́вным возсия́л еси́./ Те́мже и Христо́с да́ром чуде́с обогати́ тя,/ да чту́ще пресве́тлую па́мять твою́, зове́м ти:// помина́й ста́до твое́ моли́твами твои́ми, преподо́бне.

Ин кондак, глас 2

Я́ко по́стника благоче́стна и иску́сна,/ и страда́льца произволе́нием че́стна,/ и пусты́ни жи́теля сообра́зна,/ в пе́снех досто́йно хва́лим Афана́сия приснохва́льнаго// той бо зми́я попра́л есть.

Величание

Ублажа́ем тя,/ святы́й преподобному́чениче Афана́сие,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Благоверного князя Глеба, во Святом Крещении Давида

Тропарь, глас 4

Му́чениче Госпо́день,/ прославля́емь ве́ры твоея́ ра́ди,/ кня́же Гле́бе,/ тружда́ющимся бы́стрый помо́щник/ и немощны́м наде́жда еси́,/ ты бо неду́ги врачу́еши притека́ющим к тебе́ с ве́рою./ Те́мже и мы ве́рою мо́лимся:/ от бед изба́ви нас,// чту́щих любо́вию па́мять твою́.

Кондак, глас 2

Днесь земля́ ублажа́ется, напи́вшися кро́ве твоея́,/ и храм освяща́ется, прии́м те́ло твое́,/ святы́й му́чениче кня́же Гле́бе./ Во́лею бо страда́ния твоя́ в ничто́же вмени́в,/ от моще́й твои́х, благоуха́ния испо́лненных,/ ве́рным подае́ши освяще́ние// и всему́ ми́ру ве́лию ми́лость.

Величание

Велича́ем тя,/ страстоте́рпче святы́й Гле́бе,/ и чтим честна́я страда́ния твоя́,/ я́же за Христа́/ претерпе́л еси́.

Мученицы Раисы (Ираиды) Александрийской

Тропарь, глас 4

А́гница Твоя́, Иису́се, Раи́са,/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя с любо́вию поже́ршуюся Тебе́./ Тоя́ моли́твами,// я́ко ми́лостив, спаси́ ду́ши на́ша.

Кондак, глас 8

Храм твой всечестны́й, я́ко цельбу́ душе́вную обре́тше, вси ве́рнии велегла́сно вопие́м ти: де́во му́ченице Раисо великоимени́тая, Христа́ Бо́га моли́ непреста́нно о всех нас.

Величание

Велича́ем тя,/ страстоте́рпица Христо́ва Раи́са,/ и чтим честно́е страда́ние твое́,/ я́же за Христа́// претерпе́ла еси́.

Преподобноисповедника Александра (Уродова)

Тропарь, глас 5

В страда́ниях ве́ры ра́ди Христо́вы му́жески подвиза́лся,/ изгна́ние, заточе́ние и лише́ния претерпе́л еси́,/ сего́ ра́ди свети́льник Прему́дрости Бо́жия яви́лся еси́./ Мы́ же я́ко испове́дника тя́ почита́ем,/ Алекса́ндре преподо́бне,/ и уми́льно взыва́ем ти́:/ Го́сподеви моли́ся// о спасе́нии ду́ш на́ших.

Кондак, глас 4

Чистото́ю душе́вною боже́ственне вооружи́вся, и непреста́нныя моли́твы я́ко копие́ вручи́в кре́пко, пробо́л еси́ бесо́вския ополче́ния, Алекса́ндре о́тче на́ш, моли́ непреста́нно о все́х на́с.

Величание

Велича́ем тя,/ святи́телю о́тче Алекса́ндре,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Божией Матери пред иконой Ее Оршанской

Тропарь, глас 4

Днесь светло красуется древний град Орша, Яко зарю солнечную восприимши, Владычице чудотворную твою икону, от неяже помощь явила еси святому Афанасию в скорбех, и Спиридону печатнику поддержка и утешение была еси, Обителям иноческим заступление и покров, и всем прибегающим к иконе твоей милостивая Мати, к нейже ныне и мы припадаем и тепле вопием: О, причудная Владычице Богородице, молися из тебе воплощенному Христу Богу нашему, да спасет души наша яко милосерд.

Величание

Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою притекающим.