Православный календарь на 10-07-2024

Преподобного Сампсона Странноприимца

Тропарь, глас 8

В терпе́нии твое́м стяжа́л еси́ мзду твою́, о́тче преподо́бне,/ в моли́твах непреста́нно терпе́вый, ни́щия возлюби́вый и сия́ удовли́вый,/ но моли́ся Христу́ Бо́гу, Сампсо́не ми́лостиве блаже́нне,// спасти́ся душа́м на́шим.

Кондак, глас 8

́Яко врача́ всеизря́дна и моли́твенника благоприя́тна,/ к ра́це твое́й боже́ственней притека́юще, Сампсо́не богому́дре преподо́бне,/ соше́дшеся любо́вию, псалмы́ и пе́сньми, ра́дующеся, Христа́ прославля́ем,// такову́ю тебе́ благода́ть подава́юща исцеле́ний.

Величание

Ублажа́ем тя,/ преподо́бне о́тче Сампсо́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобного Амвросия Оптинского

Тропарь, глас 5

Я́ко к целе́бному исто́чнику/ притека́ем к тебе́, Амвро́сие, о́тче наш./ Ты бо на путь спасе́ния нас ве́рно наставля́еши,/ моли́твами от бед и напа́стей охраня́еши,/ в те́лесных и душе́вных ско́рбех утеша́еши,/ па́че же смире́нию, терпе́нию и любви́ науча́еши./ Моли́ Человеколю́бца Христа́/ и Засту́пницу усе́рдную// спасти́ся душа́м на́шим.

Кондак, глас 2

Заве́т Пастыренача́льника испо́лнив/ ста́рчества благода́ть насле́довал еси́,/ боле́знуя се́рдцем о всех, с ве́рою притека́ющих к тебе́,/ те́мже и мы, ча́да твоя́, с любо́вию вопие́м ти:/ о́тче святы́й Амвро́сие,// моли́ Христа́ Бо́га спасти́ся душа́м на́шим.

Величание

Ублажа́ем тя, преподо́бне о́тче Амвро́сие, и чтим святу́ю па́мять твою́, наста́вниче мона́хов и собесе́дниче а́нгелов.

Преподобного Льва Оптинского

Тропарь, глас 3

По́стническими труды́ украси́вся,/ со ученики́ преподо́бнаго Паи́сия подвиза́лся еси́,/ от ни́хже ста́рчества благода́ть прии́м,/ сие́ во оби́тели О́птинстей насади́л еси́./ Те́мже, богоблаже́нне о́тче Льве,/ я́ко име́яй дерзнове́ние ко Го́споду,/ моли́ от страсте́й нас изба́вити// и спасти́ ду́ши на́ша.

Кондак, глас 6

Те́сным путе́м в житии́ твое́м ше́ствуя,/ на высоту́ доброде́телей возше́л еси́/ и, благода́ть па́стырства от Бо́га прии́м,/ слове́сныя о́вцы до́бре упасл еси́/ и ста́рчеству тве́рдое основа́ние/ во оби́тели О́птинстей положи́л еси́./ Те́мже ны́не, преподо́бне о́тче Льве,/ предстоя́ Пресвяте́й Тро́ице,// моли́ спасти́ся благоче́стно тя почита́ющим.

Ин кондак, глас 3

Я́ко ски́мен рыка́я на се́рдце лука́вое,/ я́ко а́гнец незло́бивый взира́я на ду́шу кро́ткую, преподо́бне о́тче Льве́ преди́вный,/ младе́нчество во Христе́ возлюби́л еси́, глаго́ля:/ пою́ Бо́гу моему́ до́ндеже е́смь./ Те́мже моли́ ми́лостиваго Го́спода/ да пода́ст и на́м о́бласть ча́дами Бо́жиими бы́ти/ и с тобо́ю пе́ти Бо́гу на́шему младе́нцем во Христе́ предстоя́л еси́/ все́м, утеше́ния от тебя́ ча́ющим./ Те́мже моли́ Го́спода на́шего/ да пода́ст и на́м о́бласть ча́дами Бо́жиими бы́ти // и спасе́т души́ на́ша.

Величание

Ублажа́ем тя,/ преподо́бне о́тче Льве́,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Макария Оптинского

Тропарь, глас 4

Прему́дрость Боже́ственную по́двиги и труды́ стяжа́в,/ ста́рческаго служе́ния сугу́бую благода́ть восприя́л еси́,/ да́ром же сло́ва свы́ше обогаще́нный,/ Бо́гу и лю́дем усе́рдно послужи́л еси́,/ о́тче богому́дре Мака́рие,/ моли́ Христа́ Бо́га// спасти́ся душа́м на́шим.

Кондак, глас 3

Блаже́нству тезоимени́тый,/ девятери́цу блаже́нств испо́лнил еси́/ и тяготы́ притека́ющих к тебе́,/ я́ко благо́е и́го Христо́во, поне́сл еси́,/ о всех душе́ю боле́знуя/ и всех вмеща́я в се́рдце свое́м./ Те́мже не забу́ди нас, чад твои́х,// О́птинская похвало́, Мака́рие блаже́нне.

Величание

Ублажа́ем тя,/ преподо́бне о́тче Мака́рие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Илариона Оптинского

Тропарь, глас 4

Боже́ственный врачева́телю страсте́й,/ ве́ры иску́сный ко́рмчий вои́стинну,/ прия́л еси́ от Го́спода благода́ть исцеле́ний,/ и на де́монов сла́вныя побе́ды,/ Иларио́не, о́тче преди́вне,/ вся бо та́йная обличи́л еси́,/ ерети́ческия у́мыслы разори́в./ Те́мже моли́ся Христу́ Бо́гу,/ от пре́лести диа́вольския изба́вити// и спасти́ ду́ши на́ша.

Ин тропарь, глас 7

Ми́ра кра́сная возненави́дев,/ мир душе́вный в души́ стяжа́л еси́,/ земна́я же наслажде́ния презре́в,/ Небе́сными дарова́нии обогати́лся еси́./ Те́мже, и тьму раско́ла отгна́в,/ ста́до Христо́во до́бре упа́сл еси́,/ спаса́й и нас моли́твами твои́ми,// Иларио́не ста́рче богопросвеще́нный.

Кондак, глас 5

Сотаи́нниче ста́рцев О́птинских/ и сонасле́дниче преде́ла Влады́чицы,/ я́ко дре́во плодови́тое, в пусты́ннем вертогра́де процве́л еси́/ и, я́ко па́стырь до́брый, ста́до Христо́во утверди́л еси́./ Ны́не же моли́ Христа́ Бо́га/ в Правосла́вии сохрани́тися и в благоче́стии утверди́тися// любо́вию тя почита́ющим.

Величание

Ублажа́ем тя,/ преподо́бне о́тче Иларио́не,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Анатолия Оптинского, старшего (Зерцалова)

Тропарь, глaс 3

У́мныя моли́твы пресве́тлый свети́льниче,/ О́птины пу́стыни ди́вная похвало́,/ Це́ркве Ру́сския украше́ние,/ Небе́снаго Иерусали́ма граждани́не,/ о́тче Анато́лие преподо́бне,/ моли́ Христа́ Бо́га// спасти́ся душа́м на́шим.

Кондак, глас 2

Богодарова́нною ти моли́твою/ возсия́л еси́, я́ко боже́ственное свети́ло,/ посреде́ собо́ра О́птинских отце́в,/ просвети́в мона́шествующих ли́ки и наста́вив,/ е́же вопи́ти непреста́нно се́рдцем и усты́:// Го́споди, Иису́се Христе́, Сы́не Бо́жий, поми́луй нас.

Величание

Ублажа́ем тя,/ преподо́бне о́тче Анато́лие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Варсонофия Оптинского

Тропарь, глaс 4

Во́ине до́блественный и изря́дный,/ све́том открове́ния, я́ко Па́вел озаре́нный,/ вся во уме́ты, Христа́ ра́ди, вмени́л еси́,/ и́ноческим по́двигом подвиза́лся еси́,/ тече́ние сконча́в и ве́ру соблю́д,/ те́мже зове́м ти:/ спаса́й нас моли́твами твои́ми,// преподо́бне Варсоно́фие, о́тче наш.

Ин тропарь, глас 3

Красото́ Це́ркве Ру́сския,/ утвержде́ние ста́рчества О́птинскаго,/ и́ноческих заве́тов блюсти́телю,/ оружено́сче Госпо́день ве́рный,/ преподо́бне о́тче Варсоно́фие,/ мече́м моли́твы зми́я победи́вый,/ вы́шния по́чести о Христе́ дости́гл еси́,/ те́мже моли́ся Тому́:/ оте́честву на враги́ побе́ду дарова́ти// и спасти́ ду́ши на́ша.

Кондак, глас 4

Яви́лся еси́ ста́рчества благочести́ваго столп о́гненный,/ любве́ Ева́нгельския сия́ние,/ проро́чествуя, назида́я и утеша́я,/ подая́ челове́ком от грехо́в врачева́ние,// преподо́бне Варсоно́фие, о́тче наш.

Ин кондак, глас 4

Боже́ственный ратобо́рец показа́лся еси́,/ о́тче наш Варсоно́фие,/ кресто́м низлага́я си́лу вра́жию,/ и си́лою Богода́нною чудеса́ сотворя́я,/ те́мже О́птина пу́стынь венча́ся сла́вою твои́х духо́вных побе́д,/ полково́дче мона́шествующих пресла́вный:/ и ны́не моли́ся Царю́ Христу́,/ побе́ды над страстьми́ дарова́ти,// ве́рою и любо́вию соверша́ющим па́мять твою́.

Величание

Ублажа́ем тя,/ преподо́бне о́тче Варсоно́фие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Анатолия Оптинского, младшего (Потапова)

Тропaрь, глaс 2

Блаже́н еси́, уте́шителю О́птинский Анато́лие,/ яви́ бо Дух Святы́й тя прему́дра наста́вника/ и ве́ры тве́рдаго испове́дника./ Сего́ ра́ди зове́м ти:/ уте́ши ду́ши на́ша смяте́нныя/ и мрак безбо́жия разори́// твои́ми к Бо́гу моли́твами.

Кондак, глас 2

Крест Госпо́день усе́рдно восприи́м,/ о́тче богому́дре Анато́лие,/ Христу́ до сме́рти после́довати возжеле́л еси́,/ испове́дниче и́стины до́блий// и благода́ти сосу́де преди́вный.

Ин кондак, глас 4

Поле́зная души́ твое́й взыску́я,/ во оде́жду и́ночества обле́клся еси́,/ кро́тости же и смире́нию Госпо́дню подража́я,/ Небе́сным жи́телем уподо́бился еси́/ и, до́брый наста́вник и́ноком быв,/ благоче́стия ве́лий побо́рник яви́лся еси́,/ преподо́бне о́тче наш Анато́лие,/ моли́ Христа́ Бо́га // спасти́ся душа́м на́шим.

Величание

Ублажа́ем тя,/ преподо́бне о́тче Варсоно́фие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Мартина Туровского

Тропарь, глас 6

Тя́жким неду́гом стра́ждущий и людьми́ забы́тый,/ моли́л еси́ жа́жду утоли́ти, преподо́бне Марти́не,/ те́мже Христо́с посла́ с Небесе́ благове́рных Бори́са и Гле́ба/ тебе́ послужи́ти и неду́г исцели́ти,/ моли́ся ны́не ко Го́споду/ спасти́ся душа́м на́шим.

Кондак, глас 4

В послуша́нии Бо́гу пре́данный,/ и мно́гим святи́телем послужи́вый,/ преподо́бне о́тче на́ш Марти́не,/ подвиза́лся еси́ пра́ведно,/ во оби́тели святы́х благове́рных князе́й Бори́са и Гле́ба,/ те́мже и Го́споду угоди́л,/ возсия́вый в чи́не преподо́бных,/ та́кожде и мы́, почита́юще па́мять твою́,/ мо́лим тя́, преподо́бне о́тче на́ш,/ моли́ Христа́ Бо́га// и на́м дарова́ти ре́вность послуша́ния.

Величание

Ублажа́ем тя,/ преподо́бне о́тче Марти́не,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.