Православный календарь на 24-06-2024

Царю́ Небе́сный,/ Уте́шителю, Ду́ше и́стины,/ И́же везде́ сый/ и вся исполня́яй,/ Сокро́вище благи́х/ и жи́зни Пода́телю,/ прииди́ и всели́ся в ны,/ и очи́сти ны от вся́кия скве́рны,// и спаси́, Бла́же, ду́ши на́ша.

Апостолов Варфоломея и Варнавы

Тропарь, глас 3

Апо́столи святи́и,/ Варфоломе́е и Варна́во,/ моли́те Ми́лостивого Бо́га,/ да прегреше́ний оставле́ние/ пода́ст душа́м на́шим.

Ин тропарь, глас 3

Язы́к огнедохнове́н в си́ле Ду́ха прие́мше,/ во пло́ти прише́дшее Сло́во пропове́даете всю́ду,/ Его́же ра́ди ов во главу́ усече́н,/ ов же ка́мением побие́н,/ и есте́ апо́стольскому ли́ку украше́ние,/ Варфоломе́е и Варна́во,/ те́мже па́мять ва́шу почита́ем и про́сим:/ моли́те Христа́ Бо́га пода́ти нам грехо́в оставле́ние.

Кондак апостола Варфоломея, глас 4

Яви́лся еси́ вели́кое со́лнце вселе́нней,/ уче́ний сия́ньми и чуде́с стра́шных, световодя́ почита́ющия тя,/ Варфоломе́е, Госпо́день апо́столе.

Кондак апостола Варнавы, глас 3

Госпо́день был еси́ всеи́стинный служи́тель,/ апо́столов же яви́лся седми́десятих пе́рвый,/ озари́л еси́ и с Па́влом про́поведь твою́,/ всем возвеща́яй Христа́ Спа́са:/ сего́ ра́ди песнопе́нии Боже́ственную па́мять твою́, Варна́во, соверша́ем.

Величание

Велича́ем вас,/ святи́и апо́столи Варфоломе́е и Варна́во,/ весь мир уче́ньми свои́ми просвети́вшия/ и вся концы́/ ко Христу́ приве́дшия.

Преподобного Варнавы Ветлужского

Тропарь, глас 1

Жела́нием духо́вным распали́вся/ и мяте́жи мирски́я отри́нув,/ к Бо́гу любо́вию приле́жно присовокупи́ся./ И Того́ вседу́шне взыску́я,/ во вну́треннюю пусты́ню отше́л еси́,/ при вода́х всели́ся,/ иде́же во слеза́х и труде́х пребыва́я многоле́тное вре́мя,/ в терпе́ниих мно́зех житие́ а́нгельское проходи́л еси́/ в наставле́нии Боже́ственнаго Ра́зума/ и мно́жество мона́хов собра́л еси́, му́дре,/ и́хже посеща́я не оста́ви,/ Варна́во преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.

Кондак, глас 8

От ю́ности, преподо́бне, плоть твою́ в поста́х и моли́твах источи́л еси́/ и, крест твой взем, усе́рдно после́довал еси Христу́,/ те́мже и к Вы́шним тече́ние ра́достно соверши́л еси́,/ иде́же со все́ми святы́ми предстои́ши./ И ны́не ста́до твое́ посеща́й, помина́я чту́щих всесвяту́ю па́мять твою́,/ да вси благода́рственно вопие́м ти:/ ра́дуйся, Богому́дре Варна́во, наста́вниче пусты́нный.

Величание

Ублажа́ем тя,/ преподо́бне о́тче Варна́во,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобного Ефрема, архимандрита Новоторжского

Тропарь, глас 1

Боже́ственною свы́ше благода́тию просвети́вся, Богому́дре,/ и по сме́рти яви́ тя све́тлость жития́ твоего́,/ те́мже источа́вши ми́рови благоуха́ние,/ и́же с ве́рою притека́ющим к ра́це моще́й твои́х, Ефре́ме преподо́бне./ Тем вопие́м ти:/ сла́ва Да́вшему ти чудеса́м благода́ть,/ сла́ва Просла́вльшему тя в чудеса́х,/ сла́ва Де́йствующему тобо́ю всем исцеле́ния.

Кондак, глас 8

Я́ко Богоявле́нная Росси́йская звезда́,/ днесь сия́я чудесы́, яви́лся еси́, преподо́бне о́тче Ефре́ме./ Тем не преста́й моля́ся о ста́де свое́м,/ сохраня́яй оте́чество твое́, град же и лю́ди,/ и́же тебе́ ве́рою почита́ющих/ и к честны́м моще́м твои́м усе́рдно притека́ющих,/ да велегла́сно тебе́ вопие́м:// ра́дуйся, Богому́дре Ефре́ме, о́тче наш.

Кондак на перенесение мощей, глас 8

Светоза́рную лучу́ похва́лим, преподо́бне,/ твою́ честну́ю ра́ку,/ многосве́тлою свеще́ю просвеща́ет бо Госпо́дь це́рковь твою́ от цельбоно́снаго гро́ба твоего́/ и озаря́ет омраче́нная на́ша сердца́./ Я́коже со́лнце незаходи́мое, о́тче,/ подо́бие о́браза твоего́ возсия́ нам,/ и град Торже́к тобо́ю благода́ть прие́млет,/ обогаща́ющу ти всех нас добро́тою чуде́с,// содея́нием благода́ти пою́щих ти: аллилу́ия.

Величание

Ублажа́ем тя,/ преподо́бне о́тче Ефре́ме,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Божией Матери пред иконой Ее «Достойно есть»

Тропарь, глас 4

Отце́в все Афо́нское мно́жество,/ собери́теся, ве́рно пра́зднующе,/ днесь ра́дующеся и све́тло восклица́юще все в весе́лии,/ Бо́жия бо Ма́терь ны́не от А́нгела пресла́вно воспева́ется.// Те́мже, я́ко Богоро́дицу, при́сно Сию́ сла́вим.

Ин тропарь, глас 4

Притеце́м ве́рнии, со дерзнове́нием/ к Ми́лующей Цари́це Богоро́дице/ и уми́льно воззове́м к Ней:/ низпосли́ на ны ми́лости Твоя́ бога́тыя:/ Це́рковь на́шу сохрани́,/ лю́ди во благоде́нствии соблюди́,/ зе́млю на́шу изба́ви от вся́каго обстоя́ния,/ мир да́руй ми́рови// и спасе́ние душа́м на́шим.

Кондак, глас 4

Пра́зднует днесь весь Афо́н,/ я́ко песнь прия́т от А́нгела чу́дно Тебе́, Чи́стей Богома́тери,// Ю́же вся тварь чтит, сла́вящи.

Величание

Досто́йно есть/ велича́ти Тя, Богоро́дице,/ честне́йшую Херуви́м/ и сла́внейшую// без сравне́ния Серафи́м.