Православный календарь на 03-05-2024

Великая Пятница

Тропарь, глас 4

Искупи́л ны еси́ от кля́твы зако́нныя/ Честно́ю Твое́ю Кро́вию,/ на Кресте́ пригвозди́вся, и копие́м пробо́дся,/ безсме́ртие источи́л еси́ челове́ком,// Спа́се наш, сла́ва Тебе́.

Кондак, глас 8

Нас ра́ди Распя́таго, прииди́те, вси воспои́м:/ Того́ бо ви́де Мари́я на Дре́ве и глаго́лаше:// а́ще и распя́тие терпи́ши, Ты еси́ Сын и Бог Мой.

Ексапостиларий

Разбо́йника благоразу́мнаго во еди́ном часе́ ра́еви сподо́бил еси́, Го́споди, и мене́ Дре́вом Кре́стным просвети́ и спаси́ мя.

Тропарь первого часа, глас 1

Распе́ншуся Тебе́, Христе́, поги́бе мучи́тельство,/ попра́на бысть си́ла вражия./ Ниже́ бо А́нгел, ниже́ челове́к,// но Сам, Го́споди, спа́сл еси́ нас, сла́ва Тебе́.

Тропарь третьего часа, глас 6

Го́споди, осуди́ша Тя иуде́е на смерть, Жи́знь всех,/ и́же чермно́е мо́ре жезло́м проше́дшии,/ на Кресте́ Тя пригвозди́ша,/ и и́же от ка́мене мед сса́вшии,/ желчь Тебе́ принесо́ша./ Но во́лею претерпе́л еси́,/ да нас свободи́ши от рабо́ты вра́жия,// Христе́ Бо́же, сла́ва Тебе́.

Тропарь шестого часа, глас 2

Спасе́ние соде́лал еси́ посреде́ земли́, Христе́ Бо́же,/ на Кресте́ пречи́стеи ру́це Твои́ просте́рл еси́,/ собира́я вся язы́ки зову́щия:// Го́споди, сла́ва Тебе́.

Тропарь девятого часа, глас 8

Ви́дя разбо́йник Нача́льника жи́зни/ на Кресте́ ви́сяща, глаго́лаше:/ а́ще не бы Бог был вопло́щься, И́же с на́ми распны́йся,/ не бы со́лнце лучи́ своя́ потаи́ло,/ ниже́ бы земля́ трепе́щущи трясла́ся.// Но вся терпя́й, помяни́ мя, Го́споди, во Ца́рствии Твое́м.

 Стихира, певаемая во время целования Плащаницы, глас 5

Прииди́те, ублажи́м Ио́сифа приснопа́мятнаго, в нощи́ к Пила́ту прише́дшаго, и Живота́ всех испроси́вшаго: даждь ми Сего́ Стра́ннаго, И́же не име́ет, где главы́ подклони́ти, даждь ми Сего́ стра́ннаго, Его́же учени́к лука́вый на смерть предаде́, даждь ми Сего́ стра́ннаго, Егоже Ма́ти зря́щи на Кресте́ ви́сяща, рыда́ющи вопия́ше и ма́терски восклица́ше: увы́ Мне, Ча́до Мое́! Увы́ Мне, Све́те Мой и Утро́ба Моя́ возлю́бленная! Симео́ном бо предрече́нное в це́ркви днесь собы́стся: Мое́ се́рдце ору́жие про́йде, но в ра́дость воскресе́ния Твоего́ плачь преложи́. Покланя́емся страсте́м Твои́м, Христе́, покланя́емся страсте́м Твои́м, Христе́, покланя́емся страсте́м Твои́м, Христе́, и свято́му воскресе́нию.

Преподобного Феодора Трихины

Тропарь, глас 8

В тебе́, о́тче, изве́стно спасе́ся е́же по о́бразу:/ прии́м бо Крест, после́довал еси́ Христу́,/ и де́я учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней,// те́мже и со А́нгелы сра́дуется, преподо́бне Фео́доре, дух твой.

Кондак, глас 4

Яви́лся еси́ преди́вен житие́м,/ Фео́доре, му́дре о́тче,/ власяны́ми ру́бы* измени́в,/ па́че ца́рских сокро́вищ,/ я́же на земли́./ Сего́ ра́ди небе́сную оде́жду восприя́л еси́,/ при́сно моли́ о нас, преподо́бне.

Величание

Ублажа́ем тя,/ преподо́бне о́тче Фео́доре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Преподобного Александра Ошевенского

Тропарь, глас 4

Христа́, и́стиннаго Бо́га, все́ю душе́ю возлюби́л еси́,/ и Тому́ невозвра́тным жела́нием после́довал еси́,/ вся, я́же кра́сная и сла́дкая, возненави́дев,/ я́ко небопа́рный оре́л на Небеса́ возлете́в,/ и та́мо со а́нгелы лику́еши, и со все́ми святы́ми Святе́й Тро́ице предстои́ши,/ моли́ и нам спасти́ся ча́дом твои́м,/ я́коже обеща́лся еси́, Алекса́ндре о́тче наш.

Кондак, глас 8

Роди́телей свои́х любо́вь отри́нул еси́,/ и дом свой, я́ко чужд, оста́вил еси́,/ водвори́ бо ся в пусты́ню,/ и та́мо ви́де Бог труды́ твоя́ и по́двиги,/ па́стыря и наста́вника Богоизбра́нному ста́ду бы́ти сподобля́ет тя,/ и по преставле́нии вели́кими чудесы́ прославля́ет тя,/ исцели́ти разли́чныя неду́ги:/ моли о нас Христа́ Бо́га,/ пра́зднующих любо́вию па́мять твою́,/ да вси единогла́сно вопие́м ти:/ ра́дуйся, преподо́бне Алекса́ндре о́тче наш.

Величание

Ублажа́ем тя,/ преподо́бне о́тче Алекса́ндре,/ и чтим святу́ю па́мять твою́,/ наста́вниче мона́хов/ и собесе́дниче а́нгелов.

Мученика младенца Гавриила Белостокского

Тропарь, глас 5

Святы́й младе́нче Гаврии́ле,/ ты за Прободе́ннаго нас ра́ди от иуде́й/ лю́те от о́нехже в ре́бра прободе́н был еси́/ и за Истощи́вшаго кровь Свою́ за нас/ все те́ло твое́ на истоще́ние кро́ве/ в лю́тыя я́звы пре́дал еси́,/ ны́не же во сла́ве ве́чней с Ним всели́лся еси́./ Тем помяни́ и нас, мо́лим, зде чту́щих па́мять твою́,/ прося́ нам здра́вие телеси́// и спасе́ние душа́м на́шим.

Кондак, глас 6

Оте́чество твое́ Зверки́ бысть,/ му́чениче Христо́в Гаврии́ле,/ иде́же от и́стых звере́й – иуде́ев восхище́н:/ а́бие роди́телей лише́н еси́,/ та́же вся поря́ду лю́те претерпе́в,/ в оте́чество Небе́сное пресели́лся еси́./ Восхища́й и нас зде от вся́ких напа́стей и скорбе́й/ и умоли́, мо́лим тя,// улучи́ти ве́чное насле́дие твое́.

Величание

Велича́ем тя,/ страстоте́рпче святы́й младе́нче Гаврии́ле,/ и чтим честна́я страда́ния твоя́,/ я́же за Христа́/ претерпе́л еси́.

Святителя Николая Сербского (Велимировича)

Тропарь, глас 8

Златоустый проповедниче Воскресшаго Христа, путеводителю рода Сербскаго крестоноснаго в веках, благогласная лиро Духа Святаго, слово и любы монахов, радованье и похвало священников, учителю покаяния, предводителю богомольна воинства Христова святый Николае Сербский и всеправославный: со всеми святыми Небесныя Сербии моли Единаго Человеколюбца да дарует мир и единение роду нашему.

Кондак, глас 3

Сербскаго Лелича рождение, архипастырем во Охриде святаго Наума был еси, от престола святителя Саввы в Жичу предстал еси, научая и просвещая люди Божия Святым Евангелием. Многия к покаянию и любве ко Христу привел еси, Христа ради страсти в Дахау претерпел еси, и сего ради, святе, от Онего же прославлен еси, Николае, Божий новоявленный угодниче.

Величание

Величаем тя, / святителю отче Николае, / и чтим святую память твою / ты бо молиши за нас / Христа Бога нашего.

Святителя Феодосия, епископа Коломенского, исповедника

Тропарь, глас 4

Днесь торжествует Коломна славная,/ величающи святителя своего,/ Феодосия предивнаго,/ в годину лютую гонения безбожнаго/ Христа небоязненно проповедавшаго/ и подвиг страдания и терпения совершившаго./ Темже и мы, чада твоя, прославляем тя, исповедниче,/ яко пастыря добраго и Православныя веры поборника,/ со умилением и любовию зовуще:/ моли Человеколюбца Бога,// да спасет души наша.

Кондак, глас 2

Яко сокровище пребогатое,/ честныя мощи твоя обретошася,/ священноисповедниче отче Феодосие,/ ты бо, во дни гонения безбожнаго/ страдания Христа ради мужественне претерпел еси./ Ныне же в Небесных селениих пребываеши/ и молиши Человеколюбца Бога,// да спасет души наша.

Величание

Велича́ем тя,/ священноиспове́дниче Феодосие,/ и чтим святу́ю па́­мять твою́,/ ты бо мо́лиши за нас// Христа́ Бо́га на́шего.