Православный календарь на 26-07-2026

Святых отцов шести Вселенских Соборов

Тропарь, глас 8

Препросла́влен еси́, Христе́ Бо́же наш,/ свети́ла на земли́ отцы́ на́ша основа́вый/ и те́ми ко и́стинней ве́ре вся ны наста́вивый,// Многоблагоутро́бне, сла́ва Тебе́.

Кондак, глас 8

Апо́стол пропове́дание и оте́ц догма́ты/ Це́ркве еди́ну ве́ру запечатле́ша,/ я́же и ри́зу нося́щи и́стины, истка́нну от е́же свы́ше Богосло́вия,// исправля́ет и сла́вит благоче́стия вели́кое та́инство.

Архангела Гавриила

Тропарь, глас 4

Небе́сных во́инств Архистрати́же,/ мо́лим тя при́сно мы, недосто́йнии,/ да твои́ми моли́твами огради́ши нас/ кро́вом крилу́ невеще́ственныя твоея́ сла́вы,/ сохраня́я нас, припа́дающих приле́жно и вопию́щих:/ от бед изба́ви нас,// я́ко чинонача́льник Вы́шних сил.

Кондак, глас 2

Архистрати́же Бо́жий,/ служи́телю Боже́ственныя сла́вы,/ А́нгелов нача́льниче и челове́ков наста́вниче,/ поле́зное нам проси́ и ве́лию ми́лость,// я́ко Безпло́тных Архистрати́г.

Ин кондак, глас 2

На Небесе́х зря Бо́жию сла́ву и на земли́ с высоты́ подая́ благода́ть,/ нача́льниче А́нгелов, му́дре Гаврии́ле, Бо́жия сла́вы служи́телю/ и ми́ра Боже́ственный побо́рниче,/ спаса́й, соблюда́й вопию́щия ти:// сам бу́ди помо́щник, и никто́же на ны.

Ин кондак, глас 8

Пресве́тлыя и Честны́я, и Вседе́тельныя,/ пренеисче́тныя и стра́шныя Тро́ицы,/ ты еси́, Архистрати́же, сла́вный служи́телю и моли́твенниче,/ ны́не непреста́нно моли́ / изба́витися нам от вся́ких бед и мук, да зове́м ти́:// ра́дуйся, покро́ве рабо́м твои́м.

Величание Небесным Чинам бесплотным

Велича́ем вас,/ Арха́нгели и А́нгели/ и вся во́инства,/ Херуви́ми и Серафи́ми,// сла́вящия Го́спода.

Преподобного Стефана Савваита

Тропарь, глас 5

Воздержа́нием житие́ украси́ и стра́сти умертви́в, / посрами́л еси́ вра́жия прило́ги, о́тче Стефа́не, / и преложи́ся к Бо́гу, чудотво́рец показа́ся, / в ве́чней сла́ве со А́нгелы лику́я, // с ни́ми же моли́ поми́ловати ду́ши на́ша.

Кондак, глас 4

Насади́л еси́ доброде́телей рай / и напои́л еси́ то́ками слез твои́х, / я́ко жи́зни, всесла́вне, дре́во получи́в, / спаси́ моли́твами твои́ми от тли ста́до твое́, / изба́ви от обстоя́ний те́пле чту́щих тя, Стефа́не, / тя бо предста́теля велича́йша, му́дре, // вси ве́рою и любо́вию стяжа́хом.

Величание

Ублажа́ем тя,/ преподо́бне о́тче Стефа́не,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Святителя Иулиана, епископа Кеноманийского

Тропарь, глас 4

Пра́вило ве́ры и о́браз кро́тости, воздержа́ния учителя, яви тя стаду твоему Яже веще́й истина; сего ради стяжа́л еси́ смирением высо́кая, нищетою бога́тая, о́тче священнонача́льниче Иулиане, моли Христа́ Бо́га спастися душа́м на́шим.

Кондак, глас 6

Боже́ственный гром, труба́ духо́вная, ве́ры насади́телю и отсека́телю ересе́й, Тро́ицы уго́дниче, вели́кий святи́телю Иулиане, со А́нгелы предстоя́ при́сно, моли́ непреста́нно о всех нас.

Величание

Велича́ем тя,/ святителю отче Иулиане,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.