Православный календарь на 06-11-2024

Божией Матери пред иконой Ее «Всех скорбящих Радость»

Тропарь, глас 4

К Богоро́дице приле́жно ны́не притеце́м,/ гре́шнии и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны́ милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи,// Тя бо и еди́ну наде́жду и́мамы.

Ин тропарь, глас 4

Не умолчи́м никогда́, Богоро́дице,/ си́лы Твоя́ глаго́лати недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,// Твоя́ бо рабы́ спаса́еши при́сно от вся́ких лю́тых.

Ин тропарь, глас 8

Ко исто́чнику приснотеку́щему милосе́рдия,/ Пречи́стей Де́ве Богоро́дице,/ притеце́м лю́дие вси, ца́рие и кня́зи, свяще́нницы же и и́ноцы,/ му́жие и жены́, и ча́да, бога́тии и ни́щий, здра́вии и боля́щий,/ в покая́нии вопию́ще и уми́льно глаго́люще:/ Влады́чице, помози́ гре́шным рабо́м Твои́м,/ яви́, я́ко Блага́я, сла́ву Твою́,/ при́сно потщи́ся умилосе́рдитися на ны,/ испроси́ти очище́ние душ и теле́с на́ших/ от Исто́чника жи́зни на́шея, Бо́га,/ Его́же родила́ еси́, еди́на Благослове́нная.

Ин тропарь, глас 4

Днесь пресве́тло красу́ется сла́внейший град Москва́,/ име́я чудотво́рную ико́ну Влады́чицы на́шея Богоро́дицы;/ та бо, ве́рным явля́ющи чудеса́,/ низпосыла́ет да́ры целе́бныя./ Сего́ ра́ди и мы, с ве́рою припа́дающе, мо́лимся,/ и на Тоя́ пречи́стый о́браз взира́юще,/ я́ко и́стинную Саму́ю зри́м Влады́чицу на́шу Присноде́ву Богоро́дицу,/ и уми́льно глаго́лем:/ воззри́, Ма́ти Бо́жия, о́ком ми́лости,/ простри́ к нам ру́це Твои́ пречи́стыя,/ я́коже на ико́не Твое́й сие́ зри́тся,/ и пода́ждь всем скорбя́щим ра́дость,/ больны́м от всех неду́гов исцеле́ние и от бед избавле́ние,/ я́ко Ты еси́ ско́рая Предста́тельница о душа́х на́ших.

Стихира, певаемая вместо тропаря, глас 2

Всех скорбя́щих Ра́досте,/ и оби́димых Засту́пнице,/ и а́лчущих Пита́тельнице,/ стра́нных утеше́ние,/ обурева́емых приста́нище,/ больны́х посеще́ние,/ немощны́х покро́ве и Засту́пнице,/ же́зле ста́рости,/ Ма́ти Бо́га Вы́шняго Ты еси́, Пречи́стая:// потщи́ся, мо́лимся, спасти́ся рабо́м Твои́м.

Кондак, глас 6

Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́,// да не постыди́мся.

Величание

Велича́ем Тя,/ Пресвята́я Де́во,/ Богоизбра́нная Отрокови́це,/ и чтим о́браз Твой святы́й,/ и́мже то́чиши исцеле́ния/ всем с ве́рою притека́ющим.

На полиелеи Величание

Досто́йно есть велича́ти Тя,/ Богоро́дице,/ честне́йшую Херуви́м/ и сла́внейшую/ без сравне́ния Серафи́м.

Мученика Арефы Негранского и иже с ним

Тропарь, глас 1

Му́жествовавше во Христе́ проти́ву безбо́жнаго царя́,/ му́ченицы святи́и,/ и того́ неве́рие иуде́йское во Христа́ обличи́вше,/ прия́ша мук томле́ние и гла́вам усече́ние;/ тем восхвали́ша тя а́нгели,/ и ве́рных ро́ди тя прославля́ют, Аре́фо,/ и пострада́вших с тобо́ю,/ я́ко моля́щихся при́сно о душа́х на́ших.

Ин тропарь, глас 1

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,/ Человеколю́бче, мо́лимся.

Кондак, глас 4

Весе́лия хода́тай нам наста́,/ светоно́сный днесь страстоте́рпцев пра́здник,/ его́же соверша́юще, сла́вим в вы́шних Су́щаго Го́спода.

Величание

Велича́ем вас,/ страстоте́рпцы святи́и, Аре́фо со пострада́вшими с тобо́ю,/ и чтим честна́я страда́ния ва́ша,/ я́же за Христа́/ претерпе́ли есте́.

Преподобного Зосимы (Верховского)

Тропарь, глас 8

Любо́вию Христо́вою уязви́лся еси́, преподо́бне, вся́ кра́сная ми́ра отри́нув, по́двигом безмо́лвия подвиза́вся, доброде́тели Боже́ственныя стяжа́л еси́; прему́дрости Бо́жия прича́стниче, о́тче на́ш Зоси́мо, моли́ Христа́ Бо́га и Пречи́стую Де́ву Богоро́дицу спасти́ся душа́м на́шим.

Кондак, глас 6

Избра́нниче Бо́жий и ста́рче прему́дрый, наста́вниче на́ш Зоси́мо, от ю́ности по́стническою стезе́ю ше́дый, во оде́жду кро́тости и терпе́ния обле́клся еси́, те́мже да́р Свята́го Ду́ха улучи́в, мно́гие ду́ши Христу́ уневе́стил еси́. Ны́не в со́нме преподо́бных на Небесе́х лику́еши, моля́ся непреста́нно о чту́щих святу́ю па́мять твою́.

Величание

Ублажа́ем тя,/ преподо́бне о́тче Зоси́мо,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Преподобного Арефы, затворника Печерского, в Ближних пещерах

Тропарь, глас 2

Бога́тство твое́ душе́вное погуби́ти хотя́ враг,/ помрачи́л тя бя́ше бога́тством тле́нным испе́рва,/ но всех спаса́яй Госпо́дь/ бога́тство ги́бнущее окра́сти попусти́,/ душе́вное же невре́дно соблю́д,/ Небе́сных сокро́вищ насле́дника тя показа́, Аре́фо,// тем тя чтим и ублажа́ем.

Кондак, глас 2

И́ова терпеливоду́шнаго ревну́я благодаре́нию,/окраде́ний тле́ннаго своего́ име́ния претерпе́л еси́ благода́рне, преподо́бне Аре́фо,/ тем с ним обре́т нетле́нное име́ние на Небеси́,// моли́ Христа́ Бо́га о всех нас.

Величание

Ублажа́ем тя,/ преподо́бне о́тче Аре́фо,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Блаженного Елезвоя, царя Ефиопского

Тропарь, глас 4

И́же Боже́ственным раче́нием подви́гся/ на отмще́ние проли́тыя кро́ви пра́ведных,/ я́ко Дави́д от Самуи́ла,/ ты же от Зино́на преди́внаго,/ проро́чески я́же сбы́тися тебе́ предре́кша,/ е́же обеща́нием к нему́,/ и того́ благослове́нием побе́ды на враги́ и одоле́ния показа́вшу,/ отню́ду же со отложе́нием ца́рства/ по́стных селе́ний горы́ жизнь соверши́, Елезво́е царю́,/ моли́ Небе́снаго Царя́ Христа́// спасти́ ду́ши на́ша.

Кондак, глас 4

Высоту́ земна́го ца́рства, и венца́ вене́ц све́тлости,/ и багряни́цу отло́жшаго любве́ ра́ди Царя́ Христа́,/ от Него́же на Небесе́х сла́вно венча́на, Елезво́я царя́ му́драго,/ и́же тле́нным ца́рством и мимоходя́щим, Ца́рство Ве́чное изме́ншаго,/ в пе́ниих пе́сненных восхва́лим,// моли́твенника о ми́ре вели́ка.

Величание

Велича́ем тя,/ блаженне царю Елезво́е,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Святителя Афанасия, патриарха Цареградского

Тропарь, глас 1

Чистоты́ жития́ све́том стра́стное те́рние попали́л еси́/ и тече́нием слез безпло́дную зе́млю напои́л еси́,/ многопло́дну ни́ву душе́вную соде́лав,/ Афана́сие треблаже́нне,/ свети́ло Царюгра́ду, Патриа́рхом удобре́ние,// моли́ Христа́ Бо́га спасти́ся душа́м на́шим.

Кондак, глас 2

В све́тлую свяще́ния оде́жду оде́явся,/ мы́сленно в Небе́сныя ра́достно дости́гл еси́ Ца́рства./ Тем восприя́ша тя селе́ния пра́ведных,/ иде́же есть неизглаго́ланно весе́лие,/ и слова́, и всех святы́х ли́цы,/ святи́телю Афана́сие,// моли́ непреста́нно о всех нас.

Величание

Велича́ем тя,/ святи́телю о́тче Афана́сие,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Священномученика Лаврентия (Князева), епископа Балахинского

Тропарь, глас 4

Святи́тельства благода́тию украше́нный, ни на еди́н же де́нь оста́вите па́ству свою́ восхоте́л еси́, ю́же вручи́ тебе́ Пастыренача́льник Христо́с, Ему́же до у́з темни́чных и сме́рти, взе́м кре́ст, после́довал еси́, венце́м му́ченическим на небесе́х венча́лся еси́, священному́чениче Лавре́нтие о́тче на́ш, моли́ Христа́ Бо́га спасти́ся душа́м на́шим.

Кондак, глас 3

В годи́ну тру́дную и ско́рбную кре́ст сво́й не оставля́я нес, его́же вручи́ тебе́ Пастыренача́льник Христо́с, Ему́же до темни́цы и сме́рти после́довал еси́, венце́м му́ченическим на небесе́х венча́лся еси́, Священному́чениче Лавре́нтие о́тче на́ш, моли́ся Пресвято́й Тро́ице па́ству Нижегородскую в правове́рии соблюсти́ и оби́тель твою́ Пече́рскую сохрани́ти да́же до сконча́ния ве́ка.

Величание

Велича́ем, велича́ем Тя́, священному́чениче о́тче Лавре́нтие, и чти́м святу́ю па́мять Твою́, Ты́ бо мо́лиши за на́с Христа́ Бо́га на́шего.