Православный календарь на 05-11-2024

Апостола Иакова, брата Господня по плоти

Тропарь, глас 2

Я́ко Госпо́день учени́к, восприя́л еси́, пра́ведне, Ева́нгелие,/ я́ко му́ченик, и́маши е́же неопи́санное дерзнове́ние,/ я́ко брат Бо́жий, е́же моли́тися, я́ко иера́рх;/ моли́ Христа́ Бо́га спасти́ся душа́м на́шим.

Кондак, глас 4

О́тчее Единоро́дное Бог Сло́во,/ прише́дшее к нам в после́дняя дни,/ Иа́кове Боже́ственне,/ пе́рваго тя показа́ Иерусали́млян па́стыря и учи́теля/ и ве́рнаго строи́теля та́инств духо́вных./ Те́мже тя вси́ чтим, апо́столе.

Величание

Велича́ем тя,/ апо́столе Христо́в Иа́кове,/ и чтим боле́зни и труды́ твоя́,/ и́миже труди́лся еси́/ во благове́стии Христо́ве.

Преподобного Иакова Боровичского, Новгородского

Тропарь, глас 1

Боже́ственною благода́тию просвети́вся,/ и по сме́рти да́руеши исцеле́ние/ притека́ющим к ра́це моще́й твои́х, прему́дре Иа́кове;/ те́мже и мы ны́не чтим честны́х моще́й твои́х пренесе́ние,/ веселя́ще вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Кондак, глас 8

Ве́рою и любо́вию/ твое́ честно́е пренесе́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́це всех Христу́ Бо́гу,/ Его́же моли́ спасти́ лю́ди,/ моля́щия тя, да вси вопие́м ти:/ ра́дуйся, о́тче Иа́кове,/ всея́ Росси́йския земли́ удобре́ние.

Величание

Ублажа́ем тя,/ святы́й пра́ведный Иа́кове,/ и чтим святу́ю па́мять твою́,/ ты бо мо́лиши за нас/ Христа́ Бо́га на́шего.

Преподобного Елисея Лавришевского и святителя Лаврентия, епископа Туровского

Тропарь, глас 3

Преподо́бие о́тче наш Елиссе́е,/ с Лавре́нтием чу́дным подвиза́лся еси́, учи́телю своему́ подража́я,/ земну́ю сла́ву и честь стопа́м Христа́ пове́ргли есте́,/ те́мже Госпо́дь увенча́ вас/ нетле́нным венце́м сла́вы Своея́.

Кондак, глас 2

Ве́чная па́мять ва́ша,/ преподо́бнии Елиссе́е и Лавре́нтие,/ те́мже помина́йте чту́щих свя́то ю́/ и испроси́те земли́ на́шей благоче́стие/ и душа́м спасе́ние.

Величание

Ублажа́ем вас,/ преподо́бные отцы́ Елиссе́е и Лавре́нтие,/ и чтим святу́ю па́мять ва́шу,/ наста́вницы мона́хов// и собесе́дницы А́нгелов.

Священномученика Владимира Амбарцумова, пресвитера Московского

Тропарь, глас 3

От ю́ности Бо́га усе́рдно взыска́вый,/ и́стину в Це́ркви Правосла́вней обре́л еси́/ и, кре́ст па́стырскаго служе́ния ре́вностно подъе́мый,/ ве́рныя во дни́ гоне́ний до́бре окормля́л еси́./ Те́мже и преще́ний безбо́жных не убоя́вся,/ да́же до кро́ве пострада́л еси́,/ о́тче священному́чениче Влади́мире,/ моли́ Милостива́го Бо́га// спасти́ся душа́м на́шим.

Кондак, глас 7

Ору́жием пра́вды облече́нный,/ страда́ния за ве́ру му́жески прия́л еси́/ и, я́ко и́стинный во́ин Христо́в,/ мучи́телем противоста́л еси́, глаго́ля:/ привре́менно е́сть госпо́дство ва́ше./ Мы́ же вопие́м ти́:/ ра́дуйся, священному́чениче Влади́мире,// во Ца́рствии Небе́снем венце́м нетле́нным от Бо́га увенча́нный.

Величание

Велича́ем тя,/ священному́чениче Влади́мире,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.