Православный календарь на 08-04-2023

Лазаревой субботы

Тропарь, глас 1

́Общее воскресе́ние/ пре́жде Твоея́ Стра́сти уверя́я,/ из ме́ртвых воздви́гл еси́ Ла́заря, Христе́ Бо́же./ Те́мже и мы, я́ко о́троцы побе́ды зна́мения нося́ще,/ Тебе́, Победи́телю сме́рти вопие́м:/ оса́нна в вы́шних,// благослове́н Гряды́й во и́мя Госпо́дне.

Кондак, глас 2

Всех ра́дость Христо́с,/ И́стина, Свет, Живо́т и ми́ра воскресе́ние,/ су́щим на земли́ яви́ся Свое́ю бла́гостию/ и бысть о́браз воскресе́ния,// всем подая́ Боже́ственное оставле́ние.

Может петься задостойник, глас 8

Чи́стую сла́вно почти́м, лю́дие, Богоро́дицу, о́гнь Божества́ прии́мшую во чре́ве неопа́льно, пе́сньми велича́ем.

Праведного Лазаря Четверодневного, епископа Китийского

Тропарь, глас 4

Я́ко вели́ко сокро́вище и бога́тство некрадо́мо/ к нам прии́де из Ки́пра, Ла́заре,/ Про́мыслом всех Бо́га, повеле́нием царя́ благочести́ва,/ подая́ чту́щим тя исцеле́ния да́ром,/ избавля́я от бед и от вся́каго вре́да,/ ве́рою взыва́ющих ти:// спаси́ всех моли́твами свои́ми, Ла́заре о́тче наш.

Кондак, глас 8

Взы́де, я́ко звезда́ пресве́тлая,/ от Ки́пра честны́я мо́щи твоя́, Ла́заре,/ Ца́рствующий град освяща́ющи и христолюби́ваго царя́ веселя́щи/ и лю́ди своя́ обогаща́ющи,/ тобо́ю благода́ть исцеле́ния подаю́щи, ве́рно зову́щим ти:// ра́дуйся, Ла́заре, дру́же Бо́жий.

Величание

Велича́ем тя,/ пра́ведный дру́же Христо́в Ла́зарю,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.

Архангела Гавриила

Тропарь, глас 4

Небе́сных во́инств Архистрати́же,/ мо́лим тя при́сно мы недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я нас припа́дающих приле́жно и вопию́щих:/ от бед изба́ви нас,/ я́ко чинонача́льник Вы́шних сил.

Кондак, глас 8

Пресве́тлыя, и Честны́я, и Вседе́тельныя,/ Пренеисче́тныя и Стра́шныя Тро́ицы,/ ты еси́, Архистрати́же, сла́вный служи́телю и моли́твенниче,/ ны́не непреста́нно моли́/ изба́витися нам от вся́ких бед и мук, да зове́м ти:/ ра́дуйся, покро́ве рабо́м твои́м.

Ин кондак, глас 2

Архистрати́же Бо́жий,/ служи́телю Боже́ственныя сла́вы,/ а́нгелов нача́льниче и челове́ков наста́вниче,/ поле́зное нам проси́ и ве́лию ми́лость,/ я́ко безпло́тных Архистрати́г.

Ин кондак, глас 2

На небесе́х зря Бо́жию сла́ву/ и на земли́ с высоты́ падая́ благода́ть,/ нача́льниче а́нгелов, му́дре Гаврии́ле,/ Бо́жия сла́вы служи́телю/ и ми́ра Боже́ственный побо́рниче,/ спаса́й, соблюда́й вопию́щия ти:/ сам бу́ди помо́щник, и никто́же на ны.

Священномученика Иринея, епископа Сирмийского, Сербского

Тропарь, глас 8

Жи́знь твою́ целому́дренно соверши́л еси́, ничто́же на земли́ па́че Христа́ предпоче́т, ра́дуяся, вше́л еси́ на му́ченическое благосла́вие, проти́вяся мучи́теля повеле́нию, яви́лся еси́ венцено́сец свяще́нный, и́бо Христо́с возме́здие тебе́ дарова́ и всели́ тя в Ца́рство Небе́сное.

Кондак, глас 4

Во святи́телех благоче́стно пожи́в и муче́ния путь проше́д, и́дольския угаси́л еси́ же́ртвы, и побо́рник быв твое́му ста́ду, богом́удре. Те́мже тя почита́юще, та́йно вопие́м ти: от бед изба́ви ны при́сно твои́ми мольба́ми, о́тче наш Иринее.

Величание

Велича́ем тя,/ священному́чениче Иринее,/ и чтим святу́ю па́мять твою́,/ ты бо мо́лиши о нас// Христа́ Бо́га на́шего.